Ekimenaren helburua, ADESP eta INDAFek bultzatua, kirolean aukera berdintasuna sustatzea eta emakumeen ikusgarritasuna areagotzea da.
Nafarroako Kirolaren eta Jarduera Fisikoaren Institutuak (INDAF) eta Espainiako Kirolaren Elkarteak (ADESP) gaur aurkeztu dute Nafarroako Kirolarien Emakumeen Sarea, Navarra Arenako Kirolaren Etxean. Ekimen honen xedea kirolarekin lotura duten emakumeen ikusgarritasuna, hazkundea eta elkarrekintza sustatzea da.
Sarea kirolari, entrenatzaile, kudeatzaile, teknikari, akademiko zein etorkizuneko kirol arloko profesionaletara zuzentzen da, eta helburua da lankidetzarako espazio berritzaile bat sortzea, kirolean berdintasuna sustatzea eta eskualdeen arteko ezagutzaren eta aukeren trukea indartzea.
Aurkezpen ekitaldian parte hartu dute INDAFeko zuzendari kudeatzaileak, ADESPeko lehendakariorde eta Euskal Pilota Federazioko presidente den Javier Condek, eta Atlantako 1996ko Olinpiar Jokoetan domina lortu zuen Yolanda Solerrek, Nafarroako Sarearen enbaxadore izango denak.
Yolanda Soler, emakume kirolaren erreferentea
Yolanda Soler Espainiako kirolaren erreferente handienetako bat da. Atlantako 1996ko Olinpiar Jokoetan brontzezko domina eskuratu zuen 48 kg-ko kategorian, olinpiar domina lortu zuen lehen judoka espainiarra bilakatuz.
Bere ibilbidean zehar nazioarteko palmaresa eskuratu zuen: Europako txapeldun izan zen 1995ean, beste bi aldiz azpitxapeldun, eta bost diploma ere lortu zituen munduko txapelketetan. Goi mailako lehiaketatik erretiratu ondoren, judoaren prestakuntzan eta sustapenean lan egin du, beti ere kirolean berdintasunarekiko konpromiso irmoarekin.
Aurkezpen ekitaldian, Yolanda Solerrek aurreratu zituen Nafarroan enbaxadore gisa garatuko dituen lan-ildo nagusiak: kirol arloko emakume profesionalak laguntzea, aukera berdintasuna bultzatzea eta Sarearen parte-hartzea dinamizatzea jarduera eta topaketa ezberdinen bidez.
ADESPek prestakuntza espezifikoa eskaini dio Yolanda Solerri, Sarearen eskualdeko enbaxadore gisa jarduteko. Bere eginkizuna izango da jarduerak dinamizatzea, proiektua ikusgarri egitea eta Nafarroako emakume kirolari profesionalak laguntzea prestakuntza-jardunaldien, networking topaketen eta kongresuen bidez, beste ekintza batzuen artean.
INDAFeko zuzendari kudeatzaileak azpimarratu duenez, “proiektu honetara batzea aukera berdintasun errealarekiko dugun konpromisoan aurrerapauso bat gehiago da, kirol eta lan eremuan ere bai”.
Nafarroak bat egin du, horrela, Espainiako Kirolaren Emakumeen Eskualde Sarearekin, estatu mailako ekimen hau sendotuz. Sare honek lankidetzaren eta elkarrekintzaren erreferente berritzaile bilakatu nahi du, eta dagoeneko hainbat autonomia-erkidegoren bultzada jaso du.
